كتبت فى مايو 2014
دروس مستفادة... لدكاترة وزارة الكحة..اللى هيترشحوا وزاريا.....
فى رحلتى اليوم لمكاتب وزارة الصحة والادارة والمديرية للتقديم للترشيح الوزارى كالعادة...علشان اترفض من الجامعات...اكتر حاجات حسيتها..وخبرات اخدتها...وبعض المشاعر اختلجت بصدرى (حلوة اختلجت دى)..نستعرضها معا(شغل توك شو من اللى مبقتش اتفرج عليهم)..:
1-قد اية امضاء كل موظف شئ ثمين..لا يقدر بمال..بتحس انك حصلت على الجائزة الكبرى..وبتبقى مش عارف تعمل اية علشان تشكر الموظف على تضحيتة الرهيبة بكتابة اسمة متعرجا بخط معقوف على ورقتك الحقيرة..بعد النظر اليها الاف المرات..والنظر اليك...والتشكك من صحة الخطوة الخطيرة اللى هيقوم بها..
2-انك كدكتور غير مؤتمن...وكاذب الى ان يثبت العكس...فكل كلمة بتقلها لازم تجيب عليها دليل...وورق...ودفاتر...وشهادة 2 موظفين..وختم النسر..وبرضوا لسة مشكوك فى امرك...وينظر لك بريبة..كأنك بتعمل ورق هتختلس بية خزائن وزارة الصحة الفاضية اساسا وتهرب على كوالا لامبور...
3-انك لو بنت...مش كفاية انك تكونى غير متزوجة علشان متكنويش اخدتى اجازة رعاية طفل او مرافقة زوج...لا...لازم تقسمى على ايمانات المسلمين كلها انك مش متزوجة...وان سبب عدم زواجك دة كافى جدا علشان تثبتى انك مااخدتيش الاجازات دى اساسا...وياحبذا لو جبتى 2 شهود...وحد يؤمم وراكى وانتى بتحلفى وتقسمى امام الله...والقانون..والموظفين..
4-انك علشان تطلع صور طبق الاصل...ومعاك الاصول...الموظف بيكون متشكك من صحة الاصول اساسا....وبيفضل يبص فى الاصول...وفى الصور..وفى وشك...وكأن الشهادات دى شهادات المليونير....وانك حتى لو قلت اية..بيفضل متشكك...وتفضل تقولة..هو انا لو عاوزة ازور..كنت زورت التقدير دة اللى مودينى فى البلالا....لكن دة يعلمك ان الاحتياط واجب كل موظف..
5-انك بعد جهودك فى عمل شهادات طبق الاصل..ونضالك فى امضائها وختمها بختم النسر المقدس....يتقالك...لا يادكتورة..المرة دى عاوزين اصول....ودة يعلمك كيفية مسك لسانك عن النطق بتلك الكلمات النابية اللى بتدور بخلدك (خلد البحر)...ودة بيؤمنك من دعاوى سب وقذف موظفين اثناء تأدية عملهم فى المستقبل...
6-انك ممكن تكتسبى فوائد من اللفة دى..منها على سبيل المثال لا الحصر..
*الصبر...والجلد...وقوة الشكيمة (معرفش الشكيمة دى جايباها منين)
*زيادة الثقة بالنفس...ففى تجربتى...موظفين الوحدة اتفقوا على انى امورة (مش عارفة ازاى يعنى).. وحرام يبهدلونى كدة (ملاحظة طيبة..ماانتوا اللى مبهدلينى)..ولما دخلت للدكتورة تمضيلى علشان الختم المقدس...بصتلى وقالتلى اية دة انتى معانا هنا...قلت اة بس مستلمة نيابتى..وتسائلت مع اللى جنبها لية الناس الحلوة مش بتفضل معانا (شكلى رجعالكوا والله...مع الاعتذار لكلمة حلوة دى) ..
وعندما ذهبت للمديرية...ورقى ماكنتش ذاكرة فية انى قدمت قبل كدة...قامت الموظفة هناك قالتلى انا عارفاكى...انتى قدمتى السنة اللى فاتت...صح؟!!
قلتلها اة..(وانا فى دماغى بقول ياادى المصيبة..اجيبلها ام الرفض منين والبشوات فى شبين مش هيطلعوا الرفض الا بعد مايطلعوا عينيا..ثم دى افتكرتنى منين)..بس انا بقالى سنة مجيتش...
قالتلى الناس الحلوة ماتتنسيش (فية اية ياجدعان..عمى حيثى دة ولا فيرس جديد فى العيون)...المهم...حسسونى انى فية امل...
مع انى رايحة ولد متنكر..بتى شيرت وجينز ولامة شعرى ونظارتى واكلة نص وشى..وتكشيرتى واكلة النص التانى...ومش نايمة بقالى سنتين..مع تاتش الكئابة المعتاد....
*انى لاول مرة اعرف مسببات محتملة للصداع اللى عندى دة...يا سببة اللف...يا الشيفتات وتليفونات الزملاء اللى عجبهم شيفتاتى وعاوزين يبدلوا...مع انى حطيتت شيفتاتى من بقايا الفتات علشان اريحهم (مع انى سنيور يا جدعان )...يا سببة الشمس اللى ساهمت بشكل كبير اكييييد فى النقطة السابقة...وحالة العمى عند الموظفين...وعلشان كدة...مش هعاتب على الشمس قوى..
*ان كل دة مالوش لازمة...وكالعادة مستنية اجمع جوابات الرفض الجديدة فى البوم الانجازات...
*ان هواية جمع جوابات الرفض من الجامعات ليها مستقبل كبير....خصوصا لنواب الاطفال...اللى كل واحد فيهم بيتباهى بعدد وتنوع تلك الجوابات...
*كونى كتبت البوست دة...وانا فى الحالة دى...دة يعنى انى وصلت لمرحلة متأخرة من الجنان...مع كئابتى المعتادة...وقرف السنين...عاملين معايا احلى ميكس ...
*اهم حاجة انك بتقرب من ربنا بكثرة الذكر خاصة (حسبنا الله ونعم الوكيل)..والدعاء على الظالم والمفترى...
*ان اللى مربيهوش اهلة..ولا عرفت تربية الايام والليالى....فوزارة الصحة تهذيب وتأديب واصلاااااااااح...
