اليوم بدخل عامى ال 29 ...استحملونى شويتين..لانى عاوزة اكتب كام حاجة..معلش بقى..راعوا الظروف ;) .
احساس غريب وانا ادخل اخر سنة لى فى العشرينات اللى مفترض تبقى سنين الانطلاق لاى بنى ادم.. باستثناء اللى زى حالاتى...اللى المراتب الاولى كانت زى السكينة اللى سرقانا..من ابتدائية لاعدادية لثانوية لكلية الطب...وطبعا الاخيرة دى كانت القشة اللى قسمت ظهر البعير. .حلوة البعير دى ؛)
ومع انى تداركت الموقف شوية فى الكلية وحاولت اكبر دماغى ..لكن على مين...هناك تفنن رهيب فى الكلية دى بهدف سامى طبعا..(سامى ولا وائل..قلش رخيص)
انهم يكفروا عنك سيئاتك اللى عملتها واللى بتفكر تعملها واللى لسة ماتعرفش عنها حاجة اساسا...
وبعد الكلية بتترمى فى هياغب وزارة الكحة...والترشيح والنيابات...والفرص المفقودة...يالهوووووى..سيبك..
ادخل عامى التاسع والعشرين وانا مش مقتنعة...اة والله...اصل بجد دماغى اخرها 20 وابقى مكرماها اوى ;) بجد والله. .ازاى يا جدع...؟!!!!!
احيانا بقعد اتفرج على فيلم..تبقى البطلة عندها 26 مثلا...اة اكبر منى..الاقى دماغى بتقولى كابتن انتى اكبر منها...ازبهل كدة...واستغراااااااااب..واكمل الفيلم وانا اكثر اقتناعا انها اكبر منى !!!!!!
معرفش السبب اية....هل انى ماعشتش حياتى....هل لانى بصراحة اتربيت قوووى...(اهلى برضوا بيستعجبوا بعد ماربونى تربية رهيبة الصراحة..جيت على الاخر وضربت لية :) )
ولا يمكن علشان كان فية حاجة فى حياتى دايما اسمها بعدين....
ذاكرى الابتدائية علشان ترتاحى بعدين..الاعدادية سلمت الثانوية على الكلية على النيابة..ومش عارفة اخش دراسات عليا...ولسة مستنية بعدين...
فية نكتة قالها علاء ولى الدين رحمة الله عليه. . فى فيلم الناظر..انى حتى مش عارف انحرف...لا بقى نافع الانحراف..ولا الانغلاق...منطقة رمادى مدية على فحلقى متلون :) ..
ومع ذلك..ماقدرش اكون مجحفة....
ادخل عامى التاسع والعشرين. .وبيقولوا عليا دكتورة...مش مقتنعة برضوا..لكنة واقع...يمكن لانى بقتنع بالاشياء لما اشوفها على اللى حواليا..لكن عليا انا لا...شايفة نفسى مش جزء مشارك...متفرج يمكن...
بس اكون مجحفة لو قلت ان حياتى دى ما ادتنيش وظيفة على الرغم من الهم اللى فيها وسامية اللى كرهت اسمها من كتر ما بيقعودوا يقولوا مهنة سامية....الا انها يكفى انها من الوظائف اللى تنطبق عليها كلمة قضاء حوائج الناس...(انا مش مثالية مثالية مثاليييييية.. قلبتلكوا مريم اهو :) بغض النظر انها كانت بتقول مش انانية انااانية انااانييييية بس المعنى وصل )
بس بجد...ربنا ادانا حاجة جامدة جدا...قضاء حاجة من حوائج الناس وانت بتشتغل شغلتك عادى يعنى.....مش محتاج تدور على حد...
كمان فك كربة حد....واللى بيفك كربة حد فى الدنيا..ربنا بيفك كربتة فى الاخرة..
ناس كتير من قرف اللى احنا فية مش شايفين دة...ومنهم انا على فكرة...بس لما بهدى وبفكر..لا دى نعمة كبيرة..الحمد لله عليها....
بقضى حوائج الناس..وبفك كربتهم....
وبكفر سيئاتى بالتعامل فى وزارة الكحة ومكاتبها..وقوانينها...
ومرتبى بيدينى دافع كبير انى اتوجه لله بالدعاء لنفسى...وعلى ناس فى الوزارة....
يعنى بقرب من الله.... ;)
اشكر ربى على ماانعم على به.. .ادركتة او لا...وما كفانى اياة من شر...ادركت ذلك او لا...
الامنيات بقى...هممممم...
نفسى بالى يبقى مرتاح....على نفسى واهلى ومن احبهم...قلقى بقى مرضى...وتقريبا مابقتش انام..
نفسى اكون من الله اقرب...افهم دينى صح...ويعيننى على ذكرة وشكرة وحسن عبادتة...
نفسى السلام والامن والفرح يعم بلدى والعالم..
(قلبت على ملكات الجمال .....ومسابقة ميس يونفيرس لية كدة :/ ) بس والله حقيقى...
نفسى اسافر اجازة من نفسى ومن كل حاجة على اى بحر او ترعة او حتى مصرف ؛) اى مية والسلام...ومافيش مشاكل ولا اعرف حد..ولا حد يعرفنى...
نفسى اى حد يعرفنى يبقى بيحبنى بجد....قرفت بقى من مسميات الزمالة والمصالح....زهقت من اعرفك طالما هتفيدنى..واكبرلك طالما مبقالكش عازة...مش عاوزة اعرف عدد والسلام....وارقام بالهبل..وفيس بالعبيط...وعند اول ملف...تلاقى نفسك لوحدك يا معلم...معنديش مشكله...بس ماتعشمنيش بالاخوة والصداقة اللى مافيش زيها...وفى الاخر ولا تحصل اندل من اخوا وائل جسار فى كليب غريبة الناس..غريبة الدنيا دية...اعز الناس بيتغير عليا....معلش اخدتنى الجلالة بس الاغنية حلوة الصراحة ;)
نفسى اعرف اسجل ماستر ولا دبلومة الاطفال دى قبل ما اوصل التاسعة والخمسين
:")
نفسى اتعلم اى فن من فنون القتال :) اة كونغ فو ولا كيك بوكسينج...اى نعم انها فكرة مجنونة من اللى بيطقوا فى نفوخى وشالة بيهم اهلى...بس بجد...عاوزة العب رياضة واخس شويتين والعب حاجة ضرب رزع.. هااااااااااىى......دة اللى ناقصنى الصراحة ;) وبصراحة الدنيا محتاجة كدة اليومين دول...
نفسى ابطل جنان...ولو انى كل ما باكبر بتجنن اكتر :) واقلل عصبية (ازاى...مااعرفش)...مع انى حليمة جدا...بس لما بجيب اخرى يالطيف (يستدل على ذلك من هروب افراد الاسرة من وشى وقت الذروة بتاعى...وتحاشيهم مش مضايقتى لا...يعدوا من امامى :/ مش عارفة لييية ؟!!! )
ونفسى ابطل هبل..حلو ابقى طيبة...بس هبلة بالزيادة كدة..لا برجع اتعب....واكتئب..ونفسيتى تبوظ.....وعارفة انة صعب جدااااا...بس ادينى بتمنى....
بتمنى الاقى بنى ادم قرا الكلام دة للاخر..ومماملش ؛)
واسمع احلى Happy birthday princess
قبل ما ارجع اكتئب....حاكم انا بكتئب اسرع من الصوت.....
شكرا لكل حد كلمنى او كتابلى على الواتس اب او الفيس بوك. ....اسعدتونى...شكرا لاهتمامكوا..وتوفير وقت فى يومكوا علشان تعايدونى بجد
made my day
وشكر اكبر...للى اهتم وقرى كلامى للاخر . ..لان دة بجد...بطل ؛)
